Saturday, September 1, 2018

අකුරු කෙටූ ගලේ කෙටූ මහා විජයබාහු රජුගේ අඹගමුව සෙල්ලිපිය

සොළී බල සෙන් පරදවා යලි සිංහල බලය තුන් සිංහලය පුරා පැතිරවූ පළමුවැනි විජයබාහු රජු (ක්‍රි.ව. 1055 - 1110) පිළිබඳව එන මහාවංශ විස්තරයේ ඔහු සිදු කල වෙහෙර විහාර ඉදිකිරීම් සහ ආගමික කටයුතු පිළිබඳව සඳහන් කිරීමේදි සමන්තකූටය හෙවත් ශ්‍රිපාද පුද බිමට අදාලව සිදු කල පුණ්‍ය ක්‍රියා සම්බන්ධයෙන් මෙවන් විස්තරයක් හමුවේ. 

"....සමන්තකූටයෙහි ශ්‍රීපාද ලංජනය වඳිනු පිණිස දුර්ගමාර්ගයෙහි යන මිනිස්සු වෙහෙසට පත් නොවෙත්වා යි දන් වැට සඳහා හැල් කෙත් ආදියෙන් යුක්ත වූ ගිලීමලය [නමැති ගම] දුන්නේය. කදලිගාම මාර්ගයෙහිද, හූවරට්ඨ මාර්ගයෙහිද වෙන් වෙන්ව ගම් දී සාලාද කරවීය. රජු "අනාගත රජවරු ඒවා නොගනිත්වායි" අකුරු ලියා ශිලාස්තම්භ පිහිටවීය.."

ගිණිගත්හේන-නාවලපිටිය B319 මාර්ගයේ ගිණිගත්හේන නගරයේ සිට කිලෝමීටර් 5 පමණ දුරකින් ප්‍රධාන මාර්ගයෙන් මදක් ඇතුලට වන්නට පිහිටි අකුරු කෙටූ පාණ නම් වූ කුඩා කඳු ගැටයක පැතලි ගල් දෙකක කොටා ඇති සෙල්ලිපියක් දැනට පුරාවිද්‍යා ආරක්ෂිත ප්‍රදේශයක් ලෙස නම් කල ස්ථානයක දැකිය හැක. H.C.P. බෙල් මහතා 1906-1912 වර්ෂ කාල පරාසය තුල පරික්ෂා කල සෙල් ලිපි ලේඛනයේ උඩ බුළත්ගම කොට්ඨාශයේ අඹගමුව කෝරලයට අයත් අඹගමුව [අඹගමුව හරහා වර්ෂ 1819 දී ගමන් කල ජෝන් ඩේවිගේ විස්තරය කියවීමට >> ] ග්‍රාමයේ සිරි සංඝ බෝ විජයබාහු නම සඳහන් (පළමුවන විජයබාහු ලෙස ඔහු නිවැරදිව හඳුනාගන්නා) රජුගේ සෙල් ලිපියක් ගැන සටහනක් හමුවේ. පසු කලක Z. වික්‍රමසිංහ මහතාට ලැබුන එහි පිටපත් කිහිපයක් ආශ්‍රයෙන් ඔහු එය කියවා Epigraphia Zeylanica දෙවෙනි වෙලුමට එම සෙල් ලිපියේ විස්තර පර්යේෂණ පත්‍රිකාවක් ලෙස ඉදිරිපත් කරයි. 

Z. වික්‍රමසිංහ මහතා ඉදිරිපත් කරන විස්තරයේ (1928) සඳහන් වන පරිදි අඹගමුව ග්‍රාමයේ හස්ති ගල නමැති කඳු මුදුනට නැගෙනහිර දෙසින් පිහිටි අකුරු කෙටූ ගල කන්ද නම් ස්ථානයක මෙම ලිපිය පිහිටා ඇත. පූජ්‍ය කිරිඇල්ලේ ඥාණවිමල හිමියන් එය සන්ක්ලයින් නම් තේ වත්තක් මැද අක්කර කාලක පමණ වන ලැහැබක් තුල අකුරු කෙටූ පාන නමින් ගම්වාසීන් හඳුන්වන තැනක පිහිටි බව 1967 දී පවසයි (දැනට සෙල්ලිපිය හමුවන ස්ථානය අවට ගම්මුන්ගේ නිවාස හමුවන මුත් St. Clive නමැති තේ වත්තක් පැරණි අඟලේ සිතියම් වල මේ ප්‍රදේශයේ ලකුණු කර ඇත.).
මෙම ගිරි ලිපියේ එන වැදගත් කරුණු කිහිපයක් මෙසේ පෙලගැස්විය හැක. මේ සඳහා Z. වික්‍රමසිංහ මහතාගේ කියවීම මෙන්ම මෑතකදි නැවතත් Inscription of Ceylon සයවන වෙලුමට මහාචාර්ය සිරිමල් රණවැල්ල මහතා සැපයූ පරිවර්තනයද ආධාර විය.

  • සිරිසඟබෝ විජයභාහු ලෙසින් ලිපියේ හැඳින්වෙන රජතුමාගේ පියා සූර්ය වංශයට (රිවිහු අන්වයැ) අයත් ඔක්කාක (ඔකාවස්) රජ පරපුරෙන් පැවතෙන  අභා සලමෙවන් රජු සහ මව දෙවුගොන් රැජින වූ බව සහ ඔහු ආදිපාද (ඈපා), මහාදිපාද (මහයා) පිළිවෙලින් පැමිණ 'ලක්දිවු' හි රජ වූ බව.
  • රජුගේ ගුණ වයන ප්‍රශස්ති කොටසේ සඳහන් වන දෙව්වරු කිහිප දෙනෙකුගේ නම් වලින් එම යුගයේ මෙරට ප්‍රචලිත දෙව්වරු පිළිබඳවද යම් අදහසක් ලබා ගත හැක. එහි සඳහන් වනුයේ විජයබාහු රජු බල පරාක්‍රමයෙන් මෙහෙසුරුද (මහේෂ්වර හෙවත් ශිව), අහංකාර ජීවගුණයෙන් උවිඳුද (විෂ්ණු), රාජකීය ගුණයෙන් සුරින්ද්‍රද (දෙවියන්ගේ නායකයා හෙවත් ඉන්ද්‍ර), විපුල ධනයෙන් දිනිසුර ද (කුවේර) සත හට සෙත සැලසීමෙන් කිතිසුරු ද (අවලෝකතිශ්වර), නුවණින්  සුරගුරු ද (බ්‍රහස්පති හෙවත් දෙවියන්ගේ ගුරුවරයා), රූපශ්‍රියෙන් කන්දර්පත් ද (අනංගයා) පැරදවූ බවයි.
  • හෙතෙම දෙමළ සතුරු අන්දකාරය දුරලා මුළු 'ලක්දිවු' එක්සේසත් කල බව.
  • ඔහුගේ රජ්‍යත්වයෙන් 37 වසරක් ගිය තැන රාජ්‍යත්වයට පත් වීමෙන් 38 වන වර්ෂයේ මැඳින්දින සඳ පුර මස් හි පුර සතවක් දවස (First half of the Lunar month of 'Madindhina'[February-March], on the seventh day of the waxing moon.) මේ කල්පයේ බුදු වූ කකුසඳ, කොණාගම, මහා කස්සපෙ, ගොතම (කකුසඳ. කෝණාගම, මහා කාශ්‍යප සහ ගෞතම)යන සිව් බුදුන් ගේ පා පහස ලත් සමනොළකුළෙහි පිහිටි ශ්‍රිපාදයට සත් රුවණින් සැදි නොයෙකුත් අබරන පුද කර, නොයෙක් පට රෙදි , වියන් දද, කොඩි  නගා, සිව් දෑ සුවඳින් අභිෂේක කරවා, ඔහුගේම මිණි කිරුලෙන් එය සරසා පුද පූජා පැවත්වූ බව.
  • තවද පදලස් දා (ශ්‍රි පාදය) පිහිටි සමනොළකුලෙහි නඩත්තු කටයුතු සඳහාද, පුද පූජා සඳහාද, පහන් දල්වනු උදෙසාද අවශ්‍යය පියවර ගැනීමට සහ සිරිපා වැඳීමට සිව් දෙසින් එන මහා සංඝයා වහන්සේගේ පිඩු පසයටද, සෙසු සිරිපා වැඳීමට පැමිණෙන දුබල ජනයාගේ දන් වැට සඳහාද, සිරිපා වැඳීමට බැතිමතුන් පැමිණෙන 'රජරට මාර්ගයේ' අවසන් ගව් පහ තුල ගව්වෙන් ගව්වට රජු ඔහුගේ නමින් දන්සැල් ඉදි කල බව.
  • රජු පදලස් දා පිහිටි මළුවට පහතින් තවත් මළුවක් කරවා සෙසු 'අධම ජාතීන්ට අයත් ජනයාට' (People of inferior status) වන්දනා මාන කිරීමට අවස්ථාව සලසා දුන් බව සහ පළමු මළුව වට කර ප්‍රාකාරයක් බඳවා එයට පිවිසෙන සහ පිටවන ස්ථාන වල දොරටු පිහිටුවා ඒවායෙහි දොර අගුලු සවි කර ආරක්ෂාව සැලසූ බව.
  • ශ්‍රිපාද සලකුණ වසා දැලක් (Net) පිහිටවූ බව.
  • රජු ශ්‍රිපාදය අවට සියළු ප්‍රදේශ තුල කෙත් (කුඹුරු) කරවා, විල්බා නම් පෙදෙසේ පිහිටි පහත දැක්වෙන ඉඩකඩම් ශ්‍රිපාදයට කැපකරන ලදි. එනම් කෙලගමුව පුවක් අරඹක් සහ තිනියගල, සොරගොඩ, ලියවළ, බදුලුවනැ යන ප්‍රදේශයන්හි  එක් ස්ථානයකින් කොටවැලි එකක ප්‍රමාණයේ ඉඩම් කැබලි. තවද උඩුහො කොටවැල්ලේ සහ කළඟ වෙල බද මකුළුමුල, අඹගමුව, වැලිගම්පොළ සහ උලපනා යන ප්‍රදේශ වල පුවක්. මෙම සියළු ප්‍රදේශ වලට රාජපුරුෂයන් ඇතුළු නොවිය යුතු අතර, බදු නිලධාරින්  බදු අය නොකල යුතුය. එසේම මෙම නියෝග රජුගේ 38 වන රාජ්‍ය වර්ෂයේ සිට ඉදිරියට බලපැවත්විය යුතුය.
  • මෙම රාජ නියෝගය සඳහන් කර අත්තාණි කණුව (සෙල් ලිපිය) පිහිටුවීමට පැමිණි රාජ්‍ය නිලධාරීන්ගෙ නම් ලිපියේ අවසානයේ දක්වා ඇත. එනම් මෙකාප්පර් වැදෑරුම් [Commander of the bodyguard] කළුන්නරුබිම් ආසත්තානාවන් ගේ නියමයෙන් පැමිණි හක්කගම කිතු, කොළොඹගලු දොවු, මහකිලිංගම් කිතල්දෙටු සහ 'රක්කමණන් වරැ' [Chief Guardian] රමුක්කඩු අගා ගේ  නියමයෙන් පැමිණි කුඩසලා කිතු.
අඹගමුව සෙල්ලිපියේ එන ග්‍රාම නාම කිහිපයක්ම සුළු වෙනස් කම් ඇතිව අද දක්වාම හඳුනාගත හැක. එම ස්ථාන හඳුනාගැනීම සම්බන්ධව මෙයට පෙර ලිපියකින් විස්තර ඉදිරිපත් කර ඇති අතර, එම අදාල ඡේදය පහත දැක්වේ. සම්පූර්ණ ලිපිය කියවීමට >> මලය රට සොයා සමනොළගිරෙන් දුම්බරට

විල්බා යනු ගිණිගත්හේන ප්‍රදේශයෙන් දකුණු සහ ගිණිකොන දෙසට වන්නට පිහිටි වර්තමාන අඹගමුව කෝරළය බවත් කෙලගමුව වර්තමාන කෙහෙල්ගමුව බවත් (කෙහෙල්ගමුව යනුවෙන් ගමක් නොමැති මුත් කෙහෙල්ගමු ගල, කෙහෙල්ගමු ඔය සහ කෙහෙල්වරාව ගම ලෙසින් එය ශේෂ වි පවති.), තිනියගල් යනු වර්තමාන තිනියගල බවත්, සොරගොඩ වර්තමාන හොරකඩ බවත් නිකොලස් හඳුනාගනී. කළඟවෙල ප්‍රදේශය යනු වර්තමාන උලපනේ, නාවලපිටිය සහ අඹගමුව ප්‍රදේශය බවත් එහි පිහිටි ලෙස ඉහත සඳහන් වූ වැලිගම්පොළ, අඹගමුව යන ගම් අදද ඒ ආකාරයෙන්ම හමුවන අතර, උලපනා යන්න උලපනේ ලෙස වෙනස් වි ඇති බවත් හෙතෙම වැඩිදුරටත් පවසයි.
පැරණි විල්බා ප්‍රදේශයේ ගම්


පැරණි කළඟවෙල  ප්‍රදේශයේ ගම්

අඹගමුව සෙල් ලිපියේ සඳහන් වන ඇතැම් තොරතුරු මෙම ලිපියෙහි මුලින්ම ඉදිරිපත් කල මහාවංශ විස්තරය සමග කෙතරම් අපූරුවට ගැලපේද යන්න විමසා බලන්න. මහාවංශයේ කදලිගාම මාර්ගය ලෙස හැඳින්වෙන්නේ කෙලගමුව එනම් වර්තමාන කෙහෙල්ගමුව (පාලියෙන් කදලිගාම) හරහා යන මාර්ගයයි. අඹගමුව සෙල්ලිපිය හමුවන්නේ එම මාර්ගයේය. සෙල්ලිපියේ එය රජරට මාර්ගය ලෙස හඳුන්වා ඇත.

මූලාශ්‍ර
  • Nicholas C.W. 1963, Historical Topography of Ancient and Medieval Ceylon, Journal of the Ceylon Branch of the Royal Asiatic Society, New Series, Volume VI, Special Number. 
  • මහාවංස 2 වෙළුම, ක්‍රි.ව. 303-1815 මාගධී පෙළ සහ සිංහල අනුවාදය, නව සංස්කාරක චන්ද්‍ර වික්‍රමගමගේ, සිංහල අනුවාදය අරුණ තලගල, 2015 
  • Bell H.C.P., 1915, Archaeological Survey of Ceylon, North Central, Central And Northern Provinces, Annual Report 1911-1912 
  • Archaeological Survey of Ceylon Epigraphia Zeylanica, Volume II (1912 - 1927), Edited and Translated by D. M. de Zilva Wickremasinghe1928
  • Archaeological Survey of Ceylon, Inscriptions of Ceylon Volume VI, G.S. Ranawella, 2007
  • ශ්‍රී සුමංගල ශබ්දකොෂය ප්‍රථම භාගය සහ ද්වීතීය භාගය- වැලිවිටියේ සෝරත හිමි, 1999
  • සපරගමු දර්ශන, කිරිඇල්ලේ ඤාණවිමල හිමි, 1967

17 comments:

  1. Nice work. Keep up the good work machan.

    ReplyDelete
  2. මෙහි එන විජයබා රජුගේ පියාණන් පිලිබද තොරතුර පනාකඩුව සන්නසේ තොරතුරු සමග ගැලපෙනවාද?

    ReplyDelete
    Replies
    1. පණාකඩුව සන්නසේ විජයබාහු රජතුමාගේ පියානන් ලෙස සඳහන් වනුයේ මුගලන් රජපා වහන්සේ කියල. අභාසලමෙවන් සහ සිරි සංඝබෝධි කියන්නේ අනුරාධපුර අවසාන භාගයේ රජවරු භාවිතා කල විරුද නම්. ඒ අනුව පණාකඩුව සන්නසේ සඳහන් නම සහ අඹගමුව සෙල්ලිපියේ සඳහන් වන විජයබා රජුගේ පියාගේ නම් අතර නොගැලපීමක් නැහැ.

      Delete
    2. මා දන්නා තරමින් අභාසලමෙවන් හා සිරිසඟබෝ යන විරුද නම් භාවිතා කලේ අභිෂේකයට පත් රජවරුන් විසින්. නමුත් විජයබා රජුගේ පියාණන් අභිෂේක ලත් රජෙක් ලෙස සඳහනක් නොමැති නිසා මෙම විරුදයන් ප්‍රාදේශික නායකයන් විසින් ද භාවිතා කරන්නට ඇතැයි සිතීම සාධාරණද? හැමදාමත් වගේ ඉතිහාසයේ මිණි මුතු ඔසොවා පෙන්වන ඔබට ඉතාමත් ස්තූතියි.

      Delete
    3. ඔබටත් බෙහෙවින්ම ස්තූතියි මෙවන් කරුණු මතු කර දක්වනවාට

      විජයබාහුගේ පියා වන මුගලන් මානවම්ම රජ පෙලපතින් පැවත එන බවට සාධක තිබෙනවා. නමුත් ඔහු රාජ්‍යත්වයට පත්වූ බවට සාධක නැහැ. ඒ අනුව ඔබේ තර්කය සාධාරනයි. මක් නිසාද යත් ඉහත විරුද නාමයන් භාවිතා කලේ අභිෂේකයට පත්වූ රජවරුන් පමණයි. මෙම සෙල්ලිපියේ එලෙස භාවිතා කිරීම ඒ අනුව නිවැරදි නැහැ. එහෙත් මෙවන් සෙල්ලිපි වල රජුගේ ගුණ වැයීමේදි රාජ්‍යත්වයට ඔහුට ඇති අයිතිය උපරිමයෙන් පෙන්විම තමා අවශ්‍ය වනුයේ. ඇතැම් විට ඒ සඳහා නිවැරදි නොවන දේ පවසන්න සිද්ද වෙනවා. වර්තමානයටත් මෙය අදාලයි නේද? මේ දවස් වල ඉන්න පාලකයෝ කලින් රජය සිදු කල ඉදිකිරීම් වල මුල් ගල් ගලවලා අලුතින් ඔවුන්ගේ නම් ඇතිව නව ඵලක දාන්නේ නිකන් නෙමේ. අද ඔබ කොළබ අවට කලින් සිටි රාජපක්ෂවරු ඉදි කල ස්ථාන වලට ගොස් බලන්න කාගෙ නම්ද තියෙන්නේ කියලා. සීතාවක උද්භීද උද්‍යානයට ගොස් බලන්න කවුද ඒක හැදුවේ කියලා. නොදන්නා බොහෝ දෙනෙක් ඒවා බලලා හිතන්නේ ඒවා මේ පාලකයන් වසර තුනකින් හැදූ බව. මොරගහකන්ද ජලාශයේ අයිතිය ලබා ගන්න රටේ ඉහලම තැනින් කියැවෙන කප්පරක් බොරු දෙස බලන්න. ඒවා දන්න අය බොරු කියලා දැනගත්තට බහුතරයකට එහෙම නෙමේ. රටක් පාලනය කරන කොට එහෙම තමා. හිටපු ජනාධිපති ප්‍රේමදාස මහතා ඒ දවස් වල තමන්ගේ පරම්පරාව ගැන, තමන් ගිය පාසල ගැන කියපු බොරු කොපමනක්ද කියලා ඒ කාලේ දේශපාලනය ගැන උනන්දුවෙන් සිටි අයට තාමත් මතක ඇති. මේ කාලේ වගේම තමා ඒ කාලෙත්.

      Delete
  3. අකුරු කෙටු ගල සෙල්ලිපිය දැකීමට යා යුතු මාර්ගය කුමක්ද?? එය එතැනම පවතීද...

    ඉතාම රසවත් සහ වැදගත් ලිබියක් භූෂණ. සස්තුතියි

    ReplyDelete
    Replies
    1. මා මෙවන් ස්ථාන ගැන ඉදිරිපත් කරන කිසිම ලිපියක එම ස්ථානයට යන මාර්ගය දක්වන්නේ නැත්තේ උවමනාවෙන්මයි. එවන් තොරතුරු අන්තර්ජාලයේ විශේෂයෙන්ම සිංහල භාෂාවෙන් ඉදිරිපත්කිරිම ඉතාමත්ම හානිකර වූ අවස්ථා එමටයි. මෙවන් තැන් වලට යා යුත්තේ ඒ ස්ථානයේ වැදගත්කම වටහාගෙන එම ස්ථානය විනාශ නොකරන පුද්ගලයන් පමණයි. විශේෂයෙන්ම මෙම බ්ලොග් එක කියවන කිසි කෙනෙක් එවන් හානියක් මෙවන් ස්ථාන වලට සිදු නොකරයි කියා මා සිතනවා. ඒත් මම අත්දැකීමෙන් දන්නවා අන්තර්ජාලයේ සර්ච් ඇන්ජින් භාවිතා කරන්නන් හරහා මගේ අනිත් බ්ලොග් එකට (http://biodiversityofsrilanka.blogspot.com/) ඇතැම් කාල වලට ආපු Hits ප්‍රමාණය. විශේෂයෙන්ම කිඹුල් හූනා, වල්ල පට්ටා වගේ දේවල වලට. ඒ එම සතුන් හෝ ශාක ගැන දැනගැනීමේ අහිංසක උව්මනාවෙන් නොවන බව පැහැදිලියිනේ. එම කාල වල මම එම පෝස්ට් බ්ලොග් එකෙන් ඉවත් කලා සිදුවන විනාශයට දායක නොවන්න ඕනේ නිසා.
      කෙසේ නමුත් ප්‍රමාණවත් ආරක්ෂාවක් සහිත ඉහත අඹගමුව සෙල්ලිපිය පිහිටි ස්ථානය පිළිබඳව එම තොරතුරු ඉදිරිපත්කිරීම් හානිකර නැහැ කියලා හිතනවා. ඇත්තෙන්ම එය එතරම් සොයාගැනීමට අපහසු තැනක නෙමේ තිබෙන්නෙ. ගිණිගත්හෙන නගරයේ සිට නාවලපිටිය පාරේ කිලෝමිටර් 4.5 පමණ යන විට වම් පසට තිබෙන කුඩා පාරක පුරාවිද්‍යා දෙපාර්තමේන්තුවේ බෝඩ් එක දකින්නට පුලුවන් එහි මීටර 400 පමණ දුරක් ගිය විට මාර්ගය අසලම මෙම ගල්පර සහිත ස්ථානය හමුවෙනවා. එය වෙනත් තැනකට ගෙනියන්න බැහැ. මෙම ලිපියෙ ඉහලින්ම තියෙන පින්තූරයේ තිබෙන විශාල ගල් කුට්ටි දෙකෙ තමා සෙල්ලිපිය තිබෙන්නේ. එහි මැද සිටින පුද්ගලයා අනුව ඔබට ඒවායේ ප්‍රමාණය වටහා ගන්නට පුලුවන්

      Delete
    2. ස්තුතියි. ඔබේ ලිපිය අනුව හිතුනෙ මේක වෙන තැනකට අරං ගියාද කියලයි. මම ගිනිගත්හෙන සංචාරයට සුදානම් නිසයි මෙතන ගැන ඇහුවෙ

      Delete
    3. හ්ම්ම්ම්. එහෙම අදහසක් එනවා තමා මුල හරියෙදි :)

      Delete
  4. //ආදිපාද (ඈපා), මහාදිපාද (මහයා) //

    භූෂණ, අ'පුර & පො'නරුව කාලවල පාලක/ප්‍රභූ තනතුරු හා ඒවාගේ කොහොමද?
    ඒවා ඉන්ග්‍රීසි Squire (or saxon "thane"), baron, earl, marquis, viscount, duke සමග සංසන්දනය කලොත් කොහොමද?

    ප්‍රභූ dukes (මහාදිපාද?) සහ රජ පවුලේ royal dukes වගේ වෙනස්කම් තියෙන්න ඇද්ද? ඒකාලයේත් නුවර යුගයේ වගේ රාජකීය ලේ අත්‍යවශ්‍ය නිසා පිටරටෙන් හෝ ගෙන්වීම වගේ ප්‍රශ්න තියෙන්න ඇද්ද එහෙම නැත්නම් ඊට වඩා ප්‍රජාතන්ත්‍රවාදී (අඩු ගණනේ රාජකීය නොවන ප්‍රභූන්ට ) තත්වයක් තියෙන්න ඇද්ද?

    සමාවෙන්න මෙහෙම ප්‍රශ්න මාලාවක් අහන එකට . ඔබ දන්නවානෙ මට පුරාවිද්‍යාවට වඩා objective ඉතිහාස (ඕනෙ රටක) පිස්සුවක් තියෙන්නෙ කියල.
    I would like to have your views on something else, too. I feel A'pura and early P'naruwa kingdoms would have been far superior to the Kandyan kingdom is democracy and philosophy (both religious and political) too. Must have been comparable to Greece and Rome. The king would have been a leader (probably like a King or a leader of one of Greek city states? At least like one of the better Roman emperors? ) rather than a dictator worshiped as a god king as in Kandyan times. Like Europe fell in to dark ages later, Lankan kingdoms too would have deteriorated in ALL aspects. Everyone accepts that arts, crafts and religion were far superior in A'pura compared to Kandy. Wouldn't it have been so in political maturity and democracy, too?


    //අභා සලමෙවන් රජු//
    රාවණාවාදීන් King Solomon හෙලයෙක් කියයිද? :-D

    ReplyDelete
    Replies
    1. Sorry. Correction:

      පාලක/ප්‍රභූ තනතුරු හා ඒවාගේ hierarchy කොහොමද?

      Delete
    2. It was උපරජ, යුවරජ or මාපා (heir apparent) who governed the දක්ඛිණ දේශ (මායා රට) during the time period which we are referring here of the reign of Vijayabahu. And ඈපා was the one who exercised the over lordship of රෝහණ or රුහුණු රට. But it had been changed then on due to the civil war which followed the demise of Vijayabahu. I have already discussed that political calamity in one of my previous post (http://trisinhala.blogspot.com/2017/02/blog-post_12.html) Hierarchy of the administrative organisations during Rajarata civilization is a broad topic which I think beyond the purview of just a comment on this post. However I don't think we can directly compare it with the European political hierarchy of the medieval period.

      Vijayabahu himself was also espoused two princesses with foreign blood probably due to the issue of royal lineage as you mentioned.

      I also believe that Rajarata civilization was far superior in all aspects than the Southwestern and central hill region kingdoms succeeded after the polonnaruwa period. However religious democracy was prevailed even during Kandy period here more than any other country as far as I am aware. This is one of such a example (http://trisinhala.blogspot.com/2015/12/blog-post.html). there are lot more with reliable evident. I might keep them for future posts :)

      Delete
    3. Isn't it better that we have a discussion on topics like this. It would be interesting to do something like that.

      Delete
  5. සෙල්ලිපියේ සඳහන් වෙන '' රජරට '' මාර්ගය ගැන වැඩි යමක් දන්නවද ඔබතුමා

    ReplyDelete